تراث ليبيا

أنت الأن غير مسجل
للتمتع بمزايا أكثر , كن إيجابياً وقم بالتسجيل

    غناوي شتاوه

    شاطر
    avatar
    الليبي
    نقيب

    عدد المشاركة : 11
    تاريخ التسجيل : 27/06/2009
    العمر : 26

    غناوي شتاوه

    مُساهمة من طرف الليبي في السبت يوليو 04, 2009 9:57 am

    السلام عليكم

    بالله ياشباب نبي مشاركات من نفس النوع غناوي وشتاوه الي عندا يفيدنا



    - لانوم ولا هنـــا ولا عــزم .... امعاه عزيـــز غايبات كلهـــن .
    - حنـــــــون ودار كبـــــــــد .... علي عــزيز وايش ايفضهــــا.
    سمـــــوني قليـــــل خيـــر .... كــان ياغــوالي انسيتكـــــم.
    - العقل صاحبة في كيــــد ....ياأعـــوينه اللــي مايكسبــة.
    - لو طالك اشبوب القسم....... بالليد ياغــــلا باذرينــــــــك.
    - نرجاك بين ما نرجـــــــاك ....... كليت ثلثين عمري امخايره.
    - والاني حديث ابكـــــــاك .......انسيت ننشدك ليش باكيه.
    - قسمت ناوعــزيز الياس..... .متراضيين ماوالــــي اقمــــح.
    - عابر سبيل يوم خطــــاه ....... أشفق عليك ياعين م البكــا.
    - جفاني عزيز وجـــــــاب ....... لروحـــه جفـــا يانويــرتـــي. 
    - ملك عــزيز غوط العقــل ....... مغير مـــازرع فيــه طيبــــــه.
    - تــريـــــد ياغنــي تربيــه ....... العزم دايره غير بالوشـــق .
    - عزيز قبـــــل ناره كــــوم ...... حساد لاطشوهـــــا بجـدت.
    - العقـــل وين مانــــــدراه ...... علي غير لـــــولاف توجعـــه .
    - خذوك ياعــــزيز الغيـــــر ...... ونا خذيت تطويلــــة رجــــــا.
    - نريــــــدك اتهـــون اتغــلا ..... مغير ياعـــزيز ايش درتلــي.


    قايله مع عقــــــال ........ العين حالفه ما تهونهم
    فى زمان قل القدر ......... لقى العقل لتراك خير له 
    فرقاهم مغير أقسام ........ لا جفيت لا هانوا على
    عرب عزاز كانوا قبل ....... الياس حال بينى وبينهم
    نرجا فيك يافـــــزاع .......... تاريتك اتراجى فى الفزع
    تميت م الغنى للوقت .......... غربال فيد حره راغبه
    يدوى العقل يالوهام............لو ما نصبن نوع هلبتكن 


    شتاوه

    دون أعزاز اتريد اتعارك ........... غير القل عليها بارك.
    - امغير اعوينه عندك شك .......... غلانا اطرطش هك وهك.
    - ايش اللي درنا نا والعين .......... ماوالتم مرهونين.
    - منهم ما منهم جت منهم ........... خانوا لولاف انظر كنهم.
    - ميس ياللولاف دناكـــم ............ لكن نرجاكم نرجاكم .
    - مغير تعب ماقابل عون ............. جريتي في جرة مرهون .
    - لا قيني ياغالي نيـــــه .......... في تكافي غير بسية.
    - ثاريتك ياعين حنونــــه ............. مرهون وما درتي دونه.



    avatar
    الليبي
    نقيب

    عدد المشاركة : 11
    تاريخ التسجيل : 27/06/2009
    العمر : 26

    رد: غناوي شتاوه

    مُساهمة من طرف الليبي في السبت يوليو 04, 2009 10:37 am

    مشكور يا خوي
    avatar
    بلسم
    الادارة
    الادارة

    عدد المشاركة : 58
    تاريخ التسجيل : 20/11/2009
    العمر : 21
    المزاج : ميه ميه

    رد: غناوي شتاوه

    مُساهمة من طرف بلسم في الخميس يناير 21, 2010 12:15 pm

    اهل العروس


    عدي مربوحة يازينة الي عمرك ماوجعتينة
    .
    مبروك العرسة ياريمةوسعة بال ويد سقيمة
    .
    يامبروك علي لبنية طيابت شاهي العشية
    .
    يامبروك علي لنية وين انجيها تفرح بية
    .
    يامبروك علي ابنيتنا ياهنايا في غيبتنا
    .
    يامبروك علي غاليتي حطيتك وين تهنيتي
    .
    يامبروك عليك عريسك اصغير قيسا من قيسك
    .
    الله يبارك مشاله صغيرة تكبر هي وياه
    .
    يامبروك عليه خداها انشله بطول العمر امعاها
    اهل العروس


    كنهو على الزين وصل حده والقدر اديروه مخده
    .
    معى الزينين دير صواب امربيها لاوي لشناب
    .
    ياوردة في اجنانك هيفي جدك شيخ وبوك شريفي
    .
    يا.... سلمك ربايه في الشارع ماهي صبايها
    .
    هي زينة والزبن الهله مبرك يوم الي حصله
    .
    هي زينة والزين سلاسل ياسعد الي بيها استاصل
    .
    انشله تطلعكي العمات سلاسل فجرة مطبوعات
    .
    انشله تطلع كيف انساها ميعلوش العيب وراها
    .
    الحوت الحوت علي ابنيتنا والشينة ماهي صنعتنا
    .
    انشله كيف بنات العم اتخش العيلة ماتندم
    .
    انشله كيف بنات العمة مافيهن وحدة مندمه
    .
    انشله كيف بنات الخالة مافيهن وحدة بطالة
    .
    الله يبارك ياعليك بنات وين مايمشن مشكورات
    .
    احنا ودينا بالتجريب شعيره مافيه شنشيب
    .
    احنا ودينا وادي حنة ياسعد الي يغرس منه
    .
    احنا بزرتنا كعب الطيب ياسعد الي انديروه نسيب
    علرجالة ~لوولاد


    وين ايخشولي مجموعة اندير اوشيقة في المربوعة
    .
    الي في الجمعة اسطار اسطار انشله منضوقلهم نار
    .
    الي في الجمعة صلايين انشله مايغيبو عالعين
    .
    انشله ماتنزلي دمعة علغالي صلاي الجمعة
    .
    يازين العشرة ياباهي من السو عليك اسم اللهي
    .
    يستاهل لعشير الباهي قولت صحة وسم اللهي
    .
    قولت صحة يستاهلها الي امقسي العين علي هلها
    .
    ندعوله في كل صلاة اجعنه رابح يالله
    .
    ندعوله في الصبح الصابح يامولاي اجعنه رابح
    .
    امك تدعيلك ياغالي بالصحة والوقت اموالي
    .
    انشله يابو عين كبيرة لاتحضر حادت لااديرة
    .
    غوالينا وغوالي الناس الله يحفضهم مالكياس
    .
    اجعن مانسمع كان الخير علي ارجالي ورجال الغير

    عيني سلم ارجالها خلوها رايق حالها
    .
    وانشله تسلم ياغالي مطراحك مايشده والي
    .
    انشله سالم غالينا بو طرف كبير امغطينا
    .
    علينا يا غالق لفام اتعيش ميه واطناشن عام
    .
    انشله تسلم ياغالينا في اعيون الناس امعلينا
    .
    ياسلم بو شنة حمرة منديرو شي الا بمرة
    .
    ياسلم بو جرد نضيف امربيهم ربة عالكيف
    .
    انشله سالم يابونة الي بيك الناس يعزونا
    .
    انشله سالم ياسيدي نور العين وجد اوليدي
    .
    ياسلم باتي وعمامي ياصيت امنور قدامي
    .
    الله امصلي عالنبي علي خوتي وضني عمي
    .
    الله امصلي عالنبيان علي بد اتراب القيزان
    .
    صلي يامصلي عالزين شفيع الميت والحيين

    تشبيهات
    مبروك اعراسك يا للاه ياعرجون رطب تابله
    .
    حمر اخدود طماطم جالو سلم بوها قال تعالو
    .
    انشله ياعويد النعناع تملا حيضانك لوساع
    .
    ياسعدودي غرسي بان عليه ضلل دار اجنان
    .
    ياسعدودي الغرس تعاله وندير الشاهي في ضله
    .
    اسعيدي غرسي راح نخل رمي العرجون ودار الضل
    .
    ياسعدودي غرسي عين تفاحة عالقلب ايرين
    حيه حيه
    خشاشين السوق الزحمة ........ركابين كراهب فخمة
    سلم بوه وسلم اذراعه...........لا ادين لاحوشه باعه
    سلم بوه فتحله جيبه.......قال اللي امخصوص انجيبه
    سلم خوته والمالية...........لا ادين لا جاب عرية

    عالرجالة ~ولولاد


    سيد العيلة والصريف انشله نوارة ميصيف
    .
    سيد العيلة وبات ضناي انشله سالم يامولي
    .
    نور العين وبات اوليدي وشلة سالم ياسيدي
    .
    نور العين وبات بنتي زهوت عمري طول حياتي
    .
    انشله بنتي يسلم بوها تربايت عز انربوها
    .
    انشله سالم ياغالي نربي نا وياك اعيالي
    .
    يا زهوت عيني لا راته وين ايقعمز بين بناته
    .
    يازهوت عيني لا راته ودومانه بين ايدياته
    .
    الي يقلو فينا ويجيبو انشله علينا ميغيبو
    .
    الله يجعنه منشوقوها ماتولع لين اندفوها
    .
    سواق اطناشن جراره انشله ماتصهدني نار
    .
    ياخشاش طريق الزرقه انشله منضوقولك فرقه
    .
    انشله ياخدام علي وين ماتمشي تلقا ضي
    .
    جياب حريري بطباقه انشله عيني ماتشتاقه
    .
    الي امعيشني كيف نبي اجعن ياعيني متشوقيه
    .
    الي معاشه دوب اصغاره انشله ماتصهدني ناره
    .
    انشله عيني ماتشتاقه عطاي العشره والناقه
    .
    انشله عيني متبكي علي عطاي الربع جني
    .
    الله يجعنه منبكوش علي عطاي العشر اقروش

    .
    اسماء


    انشله كيفك يانويره زينه في العشره والجيره
    .
    انشله كيفك يامرومه حاجتها ديمه مقيومه
    .
    انشله كيفك ياسعاد اتجيبيله ابنتا واولاد
    .
    انشله كيفك يا زنوبه محبوبه ديمه ومرغوبه
    .
    انشله كيفك ياعفاف عليها من الحساد انخاف
    .
    انشله كيفك يانجاح ايعيش امعاها ايام اسماح
    .
    انشله كيفك ياحنان الي حازك راضي فرحان
    .
    انشله كيفك ياحميده ديما فرحانه وسعيده
    .
    انشله كيفك يااحلام العيشه امعاها ياسلام

    اربي نجي السلطان هلي اسماه علي النبيان
    .
    ياربي نجي حمادي انعيش امعاه ايام اسعادي
    .
    يامولي سلم علي الي عمره ماوجعني
    .
    ياربي نجي مختار انشله منضوقوله نار
    .
    ياربي نجيه اخلوده منقعد منا مصهوه
    .
    ياربي نجي بشير لايحضر حادت لا ايدير
    .
    يامولي سلم حمد حنانه مافي كيفه حد
    .
    يامولي سلم احميد ومن خيراتك واجد زيده
    .
    ان شله سالم ياعبد الله من الحساد عليك اسمله
    .
    يامولي سلم فرج الي عمره مدار عوج
    .
    يامول سلم اوسيفا ياباهي ياسمح الصي

    لغالي هلي اسماه اصطوفا عمري ماننسى معروفه
    .
    الغالي هلي اسماه اعموره ياموليا سقم شوره
    .
    الغالي هلي اسماه علي انشله عنا مانبكي
    .
    الله يجعني مانفقد الغالي هلي اسماه حمد
    .
    يامولي سلم اخلوده منقعدمنه مصهودى
    .
    نجك لنا يامبروك الله يجعنا منشوقوك
    .
    الغالي هلي اسماه حسن اجعنا كيف القرش ايرن
    .
    الغالي هلي اسماه اعمر انشله ميشوف كدر


    _________________


      الوقت/التاريخ الآن هو الثلاثاء مايو 23, 2017 4:47 am